News Monday, Nov 8 2010

War Degdeg Ah: Qarax Sababay Dhaawaca 9 Ruux Oo Ka Dhacay Xaafad Kamid Ah Magaalada Hargeysa.

Hargeysa (Ramaas) Nov. 08, 2010 - Qarax ka dhacay maanta duhurnimadii xaafada xidigta ee degmada Maxamuud Haybe ayaa sababay dhaawaca ugu yaraan 9 qof oo rayid ah, mana jiraan cid ku dhimatay qaraxan. Dhaawaca dadkan ayaa dhamaantood wakhtigan lagu dawaynaaa cusbitaalka guud ee Magaalada Haregeysa. Waxaanay intaas wararku ku darayaan in dhaawaca 3 kamid ah dadku halis yahay.

Qaraxan ayaa dhacay kadib markii bomb gacmeed lagu dhuftay baabuur nooca yaryar ah oo markaas marayay wadada dhex marta xaafada xidigta. Sida ay shabakada Ramaasnews u xaqiijiyeen dadwayne ku sugnaa goobta qaraxu ka dhacay , ayaa sheegay in bombka uu ku tuuray baabuurka nin saarnaa isla markaasna uu khilaaf ka dhaxeeyey darawalka baabuurka watay.

Darawalka baabuurka watay ayaa warbaahinta u xaqiijiyay in ninkani uu in mudo ahba damacsanaa inuu dilo, oo uu hore ugu hanjabay. Sida uu xaqiijiyay wadihii baabuurka, waxa burburay gabi ahaan baabuurkii oo uu soo gaadhay khasaare wayni.

Ma jiro wax hadal ah oo ay wali xukuumadu kasoo saartay qaraxan lala beegsaday baabuurkan. Halkan kala socda wixii kasoo kordhan qaraxan.


Ramaasnews Desk

Hargeysa
 

Source: