News Wednesday, 23 March 2010
Gabaldhicii maanta ayay Ciidamada Al Shabaab galeen Xerta Sheekh Cali Cabdulle degmada Kaaraan magaalada Muqdisho oo ay ku noolyihiin boqolaal qoys oo Ahlu Dariiqa ah.

Ilo Xog ogaal ah ayaa xaqiijiyay in Shabaabku ay Burburiyeen Qabriga Sheekh Cali Cabdulle oo kamid ahaa meelaha ay sida weyn uqadariyaan dariiqooyinka Axmadiya iyo Qaadiriya oo dhamaantood laysku yiraahdo Jamaacatu Suufiyaha. Ciidamo katirsan Al Shabaab ayaa la xaqiijiyay in ay Miinooyin ku burburiyeen qabriga Sheekh Cali Cabdulle oo ka samaysnaa Shub aad u adag, howlgalkan galabta ka dhacay Kaaraan ayaa ahaa kii ugu adkaa waxaana lasoo sheegayaa in Shabaabku ay xabsiga dhigeen ilaalada qabriga oo isku dayay in ay albaabada ka xirtaan ciidanka Shabaab markii ay goobta soo gaareen.

Shacabka ku dhaqan waqooyiga magaalada Muqdisho ayaa caawa si weyn u hadal haya Howlgalkii ay maanta shabaab ka sameyeen waqooyiga magaalada oo ay dhulka kula simeen qabriyo ay ku aasnaayeen Mashaa’ikh kasoo jeedo Beesha Mudulood.

Dadka ayaa siyaaba kala gedisan u hadal haya dhacdadii maanta ka dhacday magaalada, Sheekh C/qaadir Soomow oo katirsan culimada Ahlusuna ayaa arrinkaasi cambaareeyay, arrintan ayaa dhacaysa xilli Kumanaan katirsan ciidamada AMISOM iyo dowlada KMG ah dhinac ka joogaan magaalada Muqdisho. Ramadaan Sheekh Mohamed RBC Radio Magaalada Muqdisho
Source:RBC Radio