Degmada Kaaraan Oo Ka Curtay Bandhig Dadka Lagu Gowracayo iyo 8-ruux 2-Todobaad Gudahood Lagu Gowracay
December 23, 2009

Sida ay xaqiijinayaan ilo wareedyo lagu kalsoonyahay oo ku nool degmada Kaaraan ee magaalada Muqdisho ilaa iyo sideed qofood oo ka tirsanaa dadka deegaanka ayaa asbuucaan iyo asbuuci ka horeeyey siyaabo kala duwan loogu gawracay gudaha degmada Kaaraan.

Falkaan oo ay sameynayaan kooxda Al-Shabaab oo haatan ka arimisa Kaaraan ayaa waxaa lagula kacay sideed ruux oo kasoo jeeda hal beel kuwaas oo aanan la aqoon waxa lagu dilay laguna gowracay.

Sideeda ruux ee la gowracay ayaa qofki ugu danbeeyey isaga iyo madaxiisa laga kala helay laba xaafadood oo ku yaala Kaaraan.

Sida ay sheegayaan dadka deegaanka,sideedan ruux ayaa dhamaantood waxa ay kasoo jeedaan Beesha Daa,uud oo ah beesha awood ahaan gacanta ku heysay degmada Kaaraan ee magaalada Muqdisho.

Afar ka mid ah dadkaasi ayaa waxaa ay ahaayeen dad horay ula soo shaqeeyey gudoomiyihii hore ee degmada Kaaraan C/llaahi Maxamed Rooble laakin haatan ka tana sulay howlahaasi,halka afarta kalana loo dilay waxaad qaraabo la tihiin C/llaahi Maxamed Rooble.

Magaalada Muqdisho gaar ahaan dhinaca waqooyi ayaa waxaa baryahan ka jiray dilal argagax leh,gaar ahaan in dadka laga jaro madaxa deetana madaxiisa iyo jirkiisa intiisa kala la kala geeyo xaafado kala fog.

Dhawaan degmada Yaaqshiid gaar ahaan xaafada Suuq Bacaad waxaa siyaabo kala duwan loo soo dhigay ilaa iyo lix ruux oo la gawracay.


Source: Jowhar