Qarax Xoogan Oo Goor Dhoweyd Gilgilay Magaalada Boosaaso
December 14, 2009

Qarax xoogan oo laga maqlayey guud ahaan qeybaha magaalada ayaa goor dhoweyd caawa gilgilay magaalada Boosaaso ee xarunta gobolka Bari.

Qaraxan oo u muuqday miino ayaa ka dhacay wadada laamiga ah ee bartamaha magaalada marta.

Lama yaqaano waxa qaraxan lala beegsaday iyo cida sameysay toona.
Warar hordhac ah oo soo gaaraya warqabadka RBC Radio ayaa sheegaya in qaraxan miino lala beegsaday gaari ay ciidamadu lahaayeen oo marayey wadada laamiga ah ee bartamaha magaalada, ma cadda in khasaare uu ka dhashey iyo in kale.

Waxaase hadda magaalada ka socda rasaas u muuqata in ciidamada amaanku ay ridayaan, taasi oo bilaabatey wax yar ka dib markii qaraxu dhacay, waxaana rasaastu ay ku fiday qeybaha magaalada gaar ahaan xaafadaha ku dhow wadada laamiga ah ee Boosaaso.

Dhawaqa qaraxan ayaa ahaa mid si weyn looga dareemay magaalada guud ahaan, iyadoo dadka badankiis ay huradada ka buraarugeen.
Waxaa adag in tafaasiil buuxda la ogaado maadaama xilliga uu hadda yahay habeen.


Source: Raxanreeb