Somaliland Horta Website

NEWS

Kulan Xiiso Leh Oo Ka Dhacay Xarunta Golaha Baarlamaanka UK Ee London
February 29, 2008

SSE iyadoo la kaashanaysa Somaliland Focus ayaa kulan balaadhan lagu qabtey Golaha Baarlamaaka UK (House of Commons, Westminster), kaasoo ay ka soo qeyb galeen xildhibaano ka tirsan Golaha Wakiilada Somaliland, ururada qurbo jooga reer Somaliland gaar ahaana kuwa ka jira waddanka Ingiriiska. Sidoo kale waxa kulanka ka soo qeb galey aqoonyahano isugu jira Somaliland iyo qaar ajaanib ahba. Waxa kale oo kulanka marti ku ahaa oo lagu casuumay wakiilka Somaliland dhowaan u soo magacowdey waddanka Ingiriiska iyo sidoo kale wakiilka isna loo soo magacaabey Ireland.

Kulanka waxa xidhiidhinayay Michael Walls oo ka socdey Somaliland Focus. Ugu horeyntiiba madasha waxa lagu soo dhoweeyay Xildhibaan Alun Michael oo si rasmi ah u furey shirka. Waxa uu ugu horeynba mahadnaq balaadhan u soo jeediyay dadkii soo abaabuley hawsha shirka. Intaa ka dibna waxa uu si kal iyo laab ah u soo dhoweeyay xildhibaanada oo uu uga mahadnaqey safarka hawleedka ay beryahanba ku joogeen waddanka Ingiriiska.

Intaa ka dib wuxuu si faahfaahsan oo xeel dheer uga warbixiyey hawlaha wax ku oolka ee dadka reer Somaliland ay fuliyeen ama gaadheen iyagoo aan haysan aqoonsi rasmi ah isla markaana duruufo dhaqaale iyo qaar horumarineedba ay haystaan.Waxa uu ku tilmaamay arrimahan ay dadka reer Somaliland ay qabsadeen qaar yididiilo iyo rajo weyni ka muuqato isla markaana u baahan in halkaa laga sii ambaqaado.

Xildhibaan Alun Michel waxa kale oo si aada uga waramay Dimuqraadiyada iyo hawlaha horyaala ee u baahan in si xilkasnimo iyo xirfadi ku jirto loo maareeyo loona maamulo. Isaga oo arrinkan ka waramaya waxa uu tusaale u soo qaatey dimuqraadiyada waddanka Ingiriiska oo imika in ka badan 700 sanno jirtey welina ay jiraan dhaliilo mar walba u baahan in la saxo. Waxa uu markaa xildhibaanku si qeexan u tilmaamay in dimuqraadiyada Somaliland ee curdinka ahi ay soo food saari karto caqabado iyo dhaliilo u baahan in la saxo. Waxa uu tusaale ahaan u soo qaatey arrimaha saxaafada ee Somaliland, xadhigii siyaasiyiinta Qaran. Wuxuu tilmaamay in Somaliland wax badan qabsatey isla markaana hawlo badani ay horyaaliin oo ay ka mid tahay dooroshooyinka soo socda. Ugu dambeyntii waxa uu xildhibaan Alun Michael kulanka u soo jeediyay inuu noqdo mid ay ka soo baxaan midho la taaban karo.

Intaa ka dib waxa hordhaca iyo ujjeeddooyinka kulanka ka waramey Cabdiraxmaan Cabdullahi Jibril oo ah guddoomiyaha dallada isku xidha ururada reer Somaliland ee Yurub (SSE). Wuxuu si kooban u carabaabay in ujjeeddada ugu muhiimsan ee kulanku yahay sidii looga faa’iideysan lahaa sidii xidhiidh toosan iyo mid dadbanba loola yeelan lahaa Golayaasha dowladda ee Golaha wakiiladu ka mid yahay. Xidhiidh joogto ah oo dhex mara qurbo jooga iyo dowlada Somaliland faa’iidada iyo horumarka ku jira ayuu tilmaamay. Sidii loola shaqeyn loona abuuri jawi wada shaqeyneed iyo iskaashi adag oo dhex mara qurbo jooga reer Somaliland ee UK iyo wakiilka Somaliland dhowaan u soo magacowdey ayaa sidoo kale la xusey.

Xildhibaanada dhowaan soo booqdey UK ayaa haddalkii lagu soo dhoweeyay, waxaana iyagoo ku hadlaya magaca xildhibaanada kale haddalo kooban madasha ka soo jeeddiyey Xildhibaan Yuusuf Maxamed Cali iyo Xildhibaan Axmed A. Kijandhe.

Ugu horreyntii waxa ay u mahadnaqeen dallada SSE iyo Somaliland Focus oo shirka abaabulkiisa ka shaqeeyay. Intaa ka dib waxay si kooban uga warameen socdaalka ay ku soo gaadheen UK iyo ujeeddada laga lahaa iyo weliba inay heleen fursadaha ay ku booqdeen golayaasha Baarlamaanka UK iyo ka Wales isla markaana ay ka soo kasbadeen waayo aragnimo iyo aqoon aan lagu soo koobi Karin madasha. Sidoo kale waxay sheegeen inay la kulmeen meelo kale ama hay’ado kale oo dowli ah. Intaa ka dib waxay si faahfaahsan uga warameen xaalada dhabta ah ee uu ku suganyahay Golaha Baarlamaanka ee Somaliland. Inkastoo xildhibaanada Goluhu ay karaankood dadaalayaan ayaa haddana waxa jira arrimo ama duruufo haysta Golaha oo caqabad ku ah in si hufan ay hawshoodu u qabsoonto. Guud ahaan waxa jira in agabkii ama kaabayaashii hawlaha u sahli lahaa xildhibaanada iyo guud ahaanba Golaha Wakiilada inay meesha ka maqanyihiin. Waxay si gaara u xuseen in tusaale ahaan xildhibaanku aanu haysan kaaliyayaal hawsha u fudeydiya ama u sahla. Cidhiidhi dhaqaale la’aan ayaa ay sidoo kale xuseen iyo weliba in guud ahaan ay jirto iyadoo goobta Golaha Wakiilada ay haysato agabkii hawsha fudeydin lahaa oo goobta ku yar.

Ugu dambeyntii waxay sheegeen in xildhibaanada laftooda ay u baahanyihiin sidii loo heli lahaa fursado sare loogu qaado aqoonta iyo waayo aragnimada xildhibaanada iyo weliba in baahi xoog leh ay xildhibaanadu u qabaan sidii loogu suuro gelin lahaa in loo sameeyo xarun ama maktabad ay ka heli karaan waxyaabaha ay u baahanyihiin inay ka helaan aqoon hufan oo ay tix raacaan ama wax ka soo xigtaan.
Gunnaanad ahaan waxay sheegeen in la adkeeyo xidhiidhka qurbojooga iyo golayaasha dowladda.

Wakiilka Somaliland dhowaan u soo magacowdey UK Mudane Adam Muuse Jibril ayaa si kooban uga waramey muhimada ay leedahay in laga shaqeeyo xidhiidhka Somaliland iyo ka UK oo run ahaantii u baahan in la horumariyo. Waxa kale oo uu xusey xidhiidhada kale ee Somaliland la leedahay qaar ka mid waddamada Africa, gaar ahaana xidhiidhka sokeeye ee u dhaxeeya Itoobiya iyo Somaliland. Waxa kale oo xusey xidhiidhka aynu la leenahay South Africa iyo socdaalo saddex jeer ahaa oo ku tagey waddanka Koonfur Africa.Waxa uu sheegey in hawsha loo soo igmadey ay tahay mid guud oo uu kula shaqeynayo dhammaan qurbo jooga reer Somaliland isla markaana loo baahanyahay in loo wada hawl galo sidii loo dhisi lahaa xidhiidh wada shaqeyneed iyo iskaashi ku salaysan in la fuliyo danta guud.

Dr. Iqbal Jhazhhay ayaa isna tilmaamay sida ay muhiim u tahay kaalinta qurbojooga. Wuxuu sheegay in tusaale ahaan qaarada Africa loo qeybiyay shan gobbol. Gobbol lixaad ayaa hadda Africa ku soo biirey, kaasoo kaalintiisu ay wax ku ool tahay. Waa gobbolka ay kaalintiisa leeyhiin qurbojooga reer Africa oo ay dabcan kuwa reer Somaliland ay ka mid yihiin. Waxa uu xusey iney hadda jiraan kulano guud oo kulmiya qurbo jooga reer Africa, kuwaasoo loo baahanyahay in qurbo jooga reer Somaliland ay ka ciyaaraan kaalinta looga baahanyahay.

Intaa ka dib waxa la bilaabay dood furan oo lagu soo afjarey haddaladii goobta laga soo jeeddiyey. Waxa qaybtan marti loogu ahaa Dr. Mohamed Abdillahi Dr. Steve Kibble (Progressio), Dr. Iqal Jhazbhay iyo Michael Walls oo daadihinayay. Wakhtiga oo aad cidhiidhi u ahaa may suuro gelin in qaybtan si fiican looga bogto. Su’aalo badan iyo arrimo badan oo la xidhiidha kaalinta qurbo jooga iyo ta golayaasha waddankii ayaa meesha la isku dhaafsadey. Sidoo kale waxa la taataabtey kaalinta dowladda Ingiriiska haddey tahay mid siyaasadeed iyo mid dhaqaaleba. Kulanka waxa la soo gunaanadey 15:30, waxaana lagu soo xidhey mahadnaq loo soo gudbiyey ururadii ka shaqeeyay kulanka, si gaara waxa loogu mahadnaqey Ayan Maxamuud oo gacan ka geysatey suurto gelinta shirka.

Isla maalintaa Isniinta fiidnimadeedii waxa xildhibaanada lagu marti qaadey Blue Ocean Restaurant. Waxa kale oo lagu marti qaadey qaar ka mid ururada reer Somaliland ee UK iyo marti sharaf kale oo ay ka mid ahaayeen suldaan Maxamuud Xaaji Xuseen iyo Abwaan Xasan Ganey. Cashada dabadeed qaar ka mid aha xildhibaanada ayaa goobta ka soo jeediyay dardaaran ku wajahan qurbo jooga iyo kaalinta kaga aadan waddankii. Xildhibaanadii haddalada ka soo jeediyey waxa ka mid ahaa: 1. Xildhibaan Maxamed Caraale (Duur) 2. Xildhibaan Cali Maxamed 3. Xildhibaan Cabdikariim Shabeel 4. Xildhibaan Khadar Adan(Ambassador) iyo Xildhibaan Ibraahim Jaamac Rayte.

Inta aan kulanka la xidhin waxa loo mahadnaqey ururadii sida firfircoon uga qayb qaatey kulanka: NOMAD, SIRAG, Somaliland Societies in UK (SSUK), West London Somaliland, Somaliland Overseas Development, British Somaliland United Group, TAFF iyo sidoo kale wakiilada ururada siyaasiga ee Somaliland, UDUB, Kulmiye iyo Ucid.
Kulanka waxa duco iyo dardaaran guud ku soo gabogabeeyay Suldaan Maxamuud Xaaji Xuseen.

__

Source: Somaliland Net

Printer Version