Mudane Axmed Xaabsade Oo Ugu Baaqay Gobolka Sool iyo Gobolka Sanaag Diyaargarowga Diiwaangelinta
December 19, 2008

Md. Axmed Cabdi Xaabsade oo ka mid ah Siyaasiyiinta Waaweyn ee G/ Sool ayaa markii u horeysay faahfaahin ka bixiyay habsami u socodka Diiwaangelinta Dalka ka socota gaar ahaan gobolada galbeedka dalka. Sidaas oo kalena laga rajaynayo in ay uga dhacaan Gobolada Sool iyo Sanaag.

Waxaana uu ugu baaqay dadka ku nool Gobollada Bariga Somaliland ee aanay diiwaangelintu ka dhicin inay u diyaar garoobaan sidii ay u qaabili lahaayeen hawlwadeenada u tegi doona, isla markaana muujiyaan Yuhuunta ay u qabaan Diiwaan gelin ka dhacda Gobolladooda.
.
Axmed Cabdi Xaabsade waxa kale oo uu ammaan u soo jeediyay Xukuumada Somaliland, Komishanka Doorashooyinka, Xisbiyada Qaranka iyo Shacbiga Somaliland, kuwaas oo uu ku tilmaamay inay meel uga soo wada jeesteen sidii ay u dhaqaajin lahaayeen Dimuqraadiyada dalka ka hanaqaaday iyo xaqiijinta tirakoobka rasmiga ah ee shacbiga Somaliland.

Mr. Xaabsade oo maanta u waramay qaar ka mid warbaahinta Maxaliga ah waxa uu si gaar ah ugu ammaanay Madaxweyne Rayaale Mowqifka cad ee uu iska taagay dhamaystirka Diiwangelinta, iyo sida kartida iyo xilkasnimada leh ee uu ugu guntaday fidinta Diiwaangelinta ee gobolada Bariga Somaliland, kuwaas oo uu tilmaamay inay ka cago jiideen Hay'adaha Deeqbixiyayaasha Caalamiga ah.

Isagoo arrimahasi ka hadlayana waxa uu yidhi: "Waxa Beryahan la hor taagnaa in Sool iyo Sanaag ka fusho diiwaangelintu, oo hay'adaha Caalamiga ahi is hor tageen inay halkaa (Bariga Somaliland) Diiwaangelintu ka Qabsoonto, Hase yeeshee waxaan ku hambalyaynayaa Madaxweynaha JSL Md, Daahir Rayaale Mowqifka uu qaatay ee ah inay lagama maarmaan tahay in Sool iyo Sanaag ay ka dhacaan Diiwaangelintu, oo uu isagu (Madaxweyne Rayaale) kharashkii ku bixi lahaa dusha u ritay.

Dadka reer Sool iyo Sanaag waxaan aad iyo aad ugu dhiiri gelinayaa inay u diyaar garoobaan diiwaangelinta ku soo food leh, kuna daydaan sidii ay gobolada kale yeeleen oo ay muujiyaan yuhuunta ay u qabaan diiwaangelinta, isla markaana Amniga iyo nabadgelyada ilaaliyaan. Taasoo Cadaynaysa gobolnimadooda iyo Jiritaankooda Qaranimaba."

Axmed Cabdi Xaabsade oo ah ruug cadaa si weyn looga yaqaan gobollada Bariga Somaliland, iyo guud ahaan Somaliyaba ayaa dhawaaqan ka soo yeedhay la filayaa sida uu ula dhacsan yahay diiwaangelinta inay rajo gelinayso dadka ku dhaqan goboladaas.

Source: Qarannews