Guddoomiyaha Golaha Wakiillada Somaliland Oo Markii Ugu Horeysay Ka Hadlay Xadhiga Guddoomiye Ku-xigeenkii Hore Ee Komishanka Xirsi Cali X. Xasan
August 14, 2008

Guddoomiyaha Golaha Wakiillada Somaliland Md. Cabdiraxmaan Maxamed Cabdillaahi (Cabdiraxmaan-cirro) ayaa sheegay in uu ku talinayo in Xabsiga laga sii daayo Guddoomiye ku-xigeenkii hore ee Komishanka Doorashooyinka Qaranka Mr. Xirsi Cali Xaaji Xasan.

Guddoomiye Cirro waxa uu sidaa ku sheegay Waraysi dhacyo kala duwan taabanaya oo uu siiyay TV-ga Horn Cable TV, waxaanu Guddoomiyuhu sheegay in aan qofka Muwaadinka ah ee Xabsiga loo taxaabo lagu tilmaami Karin Dambiile illaa Maxkamad sharci ahi ku cadayso.

Guddoomiyaha Wakiilladu waxa uu soo jeediyay in Xabsiga laga sii daayo Guddoomiye ku-xigeenkii hore ee Guddida doorashooyinka. “Waxaan ku talinayaa in Xabsiga laga sii daayo Guddoomiye Ku-xigeenkii hore ee Komishanka Doorashooyinka Qaranka ee dhawaanta la xidhay.” Ayuu yidhi Cabdiraxmaan Maxamed Cabdillaahi (Cabdiraxmaan-cirro).

Dhinaca kale, waxa uu ku Guddoomiyaha Wakiilladu ku dooday in ay Xukuumadda wada-hadal kagala jiraan arrimaha la xidhiidha heshiisyada Caalamiga ah ee ay Xukuumaddu la gasho Shirkadaha Shisheeye. Kuwaasi oo uu ka mid yahay heshiiska ay dawladu kula jirto Ganacsadaha Carbeed ee Saleebaan Al-jabiri ee kootada loogu xidhay xoolaha nool ee Somaliland.

Guddoomiye Cirro mar uu ka hadlayay wada-shaqaynta ka dhaxaysa Golohooda iyo Golayaasha kale Guurtida iyo Xukuumadda, waxa uu sheegay in ay wakhtigan ka wanaagsan tahay sidii hore, isla markaana ay meel fiican marayso. Isaga oo tilmaamay in Madaxweyne Rayaale Xeerar badan oo Golaha Wakiilladu ansixiyeen saxeexay meel-marintooda.

Mudane Cirro, isaga oo ka hadlayay doorashooyinka lagu wado in ay dalka dhawaan ka dhacaan waxa uu hoosta ka xariiqay in ay wax badan ka bedali doonaan mustaq-balka Somaliland, hadii ay u qabsoomaan si xor iyo xalaal ah.

__

Source: Hadhwanaag News