|
|
NEWS
|
|
|
“Dawooyin Lagu Soo Wal-walaaqay Hindia iyo Pakistan,
Qaarba La yidhi Waxa Laga Sameeyey Nuurad waa Cajiib” M/kuxigeenka
March 14, 2007
Shirweynihii labaad ee Ururka dhakhaatiirka Somaliland, SMA (Somaliland Medical
Association) oo ay ka soo qeybgaleen ergooyin gaadhaya 40-xubnood oo ka kala
yimi gobolada dalka ayaa maanta ka furmay Hotel Ambassador ee magaalada Hargeysa.
Furitaankii shirweynahan labaad ee ururka dhakhaatiirta Somaliland oo ay ka soo
qeybgaleen Madaxweyne Ku-xigeenka Somaliland Md, Axmed Yuusuf Yaasin, wasiirka
Caafimaadka iyo shaqada M,d C/laahi Xuseen Iimaan (Darawal), Wasiirka
Madaxtooyada Nuur Aamin Gudoomiyaha Ururka Dhakhaatiirta Somaliland, Dr,
Saleebaan Cabdi Guuleed iyo dhakhaatiir badan iyo marti sharaf kale.
Madaxweyne ku-xigeenka Somaliland Axmed Yuusuf Yaasin ayaa sheegay in baahiweyn
oo loo qabay in la helo Ururka dhakhaatiirta Somaliland isla markaana waxa uu ka
mid noqday ururkaasi oo ay ku ma’muuseen “Ururkiinan (dhakhaatiirta) oo laba
sanadood jiray baahiweyn ayaa loo qabay, tan xubinimada waan idinka aqbalay,
laakin siyaasada idinkala qeybgali maayo ee waxaan idinkala qeybgalayaa kolba
inaad ii sheegtaan aafada wadanka taala, si aan umada ugu sheego taasina waa
waxweyn”Ayuu yidhi .
Dawooyin lagu soo walwalaaqay Hindia iyo Pakistan, qaarba la yidhi waxa laga
sameeyey nuurad waa arrimo cajiiba oo weliba waxa keena kuwii aanu kala go’anay
ee Koonfurta “Waxaan filayaa inaan iska kaashan doono xukuumad ahaa iyo
ururkiina (dhahaatiirta), ta kale muhiimka ee wasaarada Caafimaadku inay sarifto
tahay waa kaalintii dawooyinka, dawooyin lagu soo wal-walaaqay Hindia iyo
Pakistan, qaarba la yidhi waxa laga sameeyey nuurad waa arrimo cajiiba oo weliba
waxa keena kuwii aanu kala go’anay ee Koonfurta halkaas ayey soo maraan oo iyaga
ayaaba inooga dheereeyey”Ayuu yidhi
Isagoo hadalkiisa sii watana waxa uu intaa raaciyey“Iiyadoo wakaaladihii
dawooyinka la sameeyo,dhakhaatiirtii ayaad tihiin oo aad wasaarada caafimaadka
kala shaqeysaan, lana oo la hagaajiyo tayada dawooyinka inoo imanaya inaad ka
hawlgashaan waa loo baahan yahay”
Waxa uu madaxweyne kuxigeenka Somliland Md, Axmed Yuusuf Yaasin ku adkeeyey
ururka dhakhaatiirta Somaliland inay talo keenaan , isagoo arrintaa ka hadlayana
waxa uu yidhi“Ururkiinu (dhahaatiirta) wasaarada Caafimaadka iyo Xukuumadaba
talo ha u keeno”
Md, Axmed Yuusuf Yaasin waxa uu farta ku fiiqay sababta ay garsoorayaasha ugu
kordhiyeen lacagtu ahayd inay joojiyaan laaluushka, laakin taasi may dhicin,
“Garsoorayaasha dabcan lacag waanu u kordhinay, waxaan is lahayn ninka
garsooraha ah ee jooga degmadu hadii wax la siiyo uu ka baxsandoona
laaluushka,laakin far ayaa taagan”Ayuu yidhi
Waxa uu tilmaamay madaxweyne kuxigeenka Somaliland Md, Axmed Yuusuf inay
dalkeena iyo dalalka dariskeena uu ka jiro cudurka halista ah ee HIV/AIDS,
sidaasi daraadeedna ay waajib tahay xukuumada iyo shacabka iyo Ururka
dhakhaatiirta Somaliland sidii ay isaga kaashan lahaayeen, iskaashi buuxana uga
yeelan lahaayeen ka wacyigelinta bulshada aafada cudurka HIV/AIDS
Wasiirka wasaarada Caafimaadka iyo shaqada Somaliland C/laahi Xuseen Iimaan (Darawal)
ayaa sheegay inaanu filanayn in loo magacaabayo wasaaradan caafimaadka, ee uu
meel kale filanayey“Markii lay soo magacaabay wasaaradan waxaan la kulmay
Ururkan(Dhakhaatiirta) oo dhisan waxaanay ii ahayd runtii waxweyn, oo anigu
ismaan lahayn meesha (Caafimaadka) ayaa lagugu qorayaa meelo kale ayaan
fikirayey, markiiba waxaan ka fikiray dhakhaatiirtii oo aan is idhi talow halkay
kala jiraan kuwii aad taqaanay, laakin waxa wixiiba isku fuuqsaday markaan
ogaaday inuu jiro urur dhisan oo shaqeynaya. Taasana runtii oo guulweyn ahayd”
Isagoo hadalkiisa sii watana waxauu intaa raaciyey“Mudadii aan joogayna (Wasaarada)
aad ayaa xidhiidhkayagu u wanaagsana hawshi wasaarada ahayd ee aan ku jirayna,
waxay noqotay iyaga uun(dhakhaatiirta) cida farsamadeeda keeni karta,
hay’adkasta oo la sameynayaana Institution Capacity iyo Human Resource Capacity
ayuunbuu wax ku noqdaan, qalabku waa wax kale, qabalka hadii la keeno oo aanay
dadkuba garanayn wax qiima oo uu leeyahay ma jirto waa daasad meel taala”.
Md, C/laahi Darawal waxa uu ka sanqadhiyey inay ku dhaqdhaqaaqayaan qalabka iyo
kartida ay la yimaadeen dhakhaatiirta Somaliland, iyadoon cidna caawin,isagoo
arrintaa ka hadlayana waxa uu yidhi“Siyaasiyiintuna shuruuc iyo siyaad la soo
dejiyey ayey dadka ku hagaan,aqoontii caafimaadkuna intiinaas ayuu ilaahay
saaray, maanta intaynu ku riiqriiqaynaaba waa intiina iyo qalabka yar ee idinku
awoodiina iyo kartidiina ku keensateen, ee aanay cidina idinka caawin”
Gudoomiyaha Ururka dhakhaatiirka Somaliland Dr, Saleebaan Cabid Guuleed oo
warbixin uu halkaasi ka jeediyey waxa uu kaga waramay waxyaabihii u qabsoomay
mudadii uu xilka hogaaminta hayey, isagoo sheegay inuu caafimaadku yahay adeega
kowaad ee bulshada, waajibna ay tahay in la siiyo qiimeynta u mudan.
__
Source: Jamhuuriya
Printer Version
| |
|
|