Faalo:  "Hoo Baaruud"
February 22, 2007

Mudaharaadkii ka dhacay London (UK) iyo Oslo (Norway) labada maalmood ee is xigga waxay jawaab u yihiin haddaladdii ka soo yeedhay Cabdilaahi Yuusuf, waraysigii uu BBCda siiyey ee ahaa Somaliya waa mid wax kala go'ayaana majiro. Dadkaa banaanbaxa sameeyay, London iyo Oslo, ee kumanyaalka ahaa, waxay ahaayeen oo ay matalayeen, isla markaana gudbinayeen, dareenka shacbiga Somaliland, kaas oo ah Gooni-Iisku Taaga Somaliland iyo Madaxbanaanida Somaliland waa kuwo aan ka-soo-noqod lahayn. Waa kuwo ay waajib tahay in uu caalamku aqoonsado haddii run laga sheegayo xaqqa dadku u leeyihiin aaya-ka-talin-tooda. Awood aan ta Allah ahayn, oo Somaliland ka horjoogsan kartaa gooni-isu-taageeda iyo madaxbannaanideeda majirto .

Bulshadda caalamku runta dhulka taala hala macaamilooto oo yaanay isku deyin cadceed soo baxday, intay sacabada indhaha iska saarto, inay tidhaahdo, "Anagu Iftiin Ma Aragno" Somaliland waa cadceeda soo baxday indhaha qiri waayaana bakoorey ka qaadi. Sidaa waxaa ka dhigan bulshadan caalamka ee ku riyoonaysa Somaaliya oo beri hore goreygu ka hadaafay. Xaqiiqadu sidey tahay Soomaaliyadaa lagu daalay deydeygeeda halka kaliya ee laga helayaa waa go'aanada oo khadka ay ku qoranyihiin ka qiimo badan yahay ee UN-ka, Ururka Jaamacada Carabta, Ururka Midowga Yurub  i.w.m  Soomaaliya meel taagan oola taaban karaa majirto ninka caasimadiisi aan geli kareyn awooda uu leeyahay ee uu wax ku heshiisiin karaa waa maxa? Awooda uu Somaliland gooni-isu-taageeda uu ku horjoogsan karaa waa maxay?. Horta, sow in uu isagu jiraa kama horeyso?. Horta jir, kadibna hadal

Waxaan kusoo gabagabeynayaa faaladeydan kooban, waxa dhadhan gaara u yeelay labadan banaan bax, gaar ahaan ka London, oo ka dhigay jawaab celin ka jawaabaysa hadalkuu Cabdilaahi Yuusuf ka sii daayey BBC-da maanta. Reer England iyo reer Norway iyagoo Somaliland ka wakiil ah, ayay bulshada caalamkana wax u sheegeen, Cabdilaahi Yuusufna ku yidhaahdeen, "Hoo Baaruud"

___

Axmed Y. Ducaale