Haweenay Ajnebi Ah Oo Laga Afduubay Badhtamaha Boosaaso
December 27, 2007

Wararka ka imanaya magaalada Boosaaso ayaa sheegaya in duleedka magaaladaas ay isku horfadhiyaan ciidamada ammaanka Puntland iyo raggii afduubay laba gabdhood oo u shaqeynayay Hay’adda MSF-Spain, kuwaas oo shalay subax lagu afduubay gudaha magaalada Boosaaso.

Wararku waxay intaas ku darayaan in labo ka mid ah ragga afduubayaasha ah iyo gaadhi yar oo ay wateen ay qabteen Ciidamada Puntland, halka raggii kale ee afduubayaasha ahaa iyo weliba labadii dumar ah ee ay haysteen lagu hareereysan yahay.

Warar aan si rasmi ah loo xaqiijin, balse isa soo taraya ayaa tibaaxaya in uu jiro dhaawac soo gaaray qaar ka mid ah raggii af-duubayaasha ahaa, kuwaas oo qaarkood gacanta lagu dhigay.

Wasiirka Dekedaha Maamulka Puntland Axmed Siciid Aw-nuur oo shir-saxaafadeed shalay ku qabtay Garoowe uu kaga hadlay arrimaha afduubka shaqaalaha u shaqeynayay hay’adda MSF-Spain, ayaa sheegay in maamulka Puntland tallaabo ka qaadayo kooxaha falalka afduubka ah ka geystay Boosaaso, isaga oo intaa ku daray in aaney wax wadahadal ah la geli doonin kooxaha afduubayaasha ah, isla markaana ay awood isticmaali doonaan.

Sidoo kalena, Madaxweynaha Maamul-goboleedka Puntland Jen. Cadde Muuse Xirsi oo arrinta afduubka ay wax ka weydiisay Idaacadda VOA laanteeda Afka Soomaaliga, ayaa sheegay in ragga afduubka ka geysanaya deegaannada Puntland laga soo diray meelo kale oo aannu sheegin, wuxuuna ku hanjabay inay raggaas gacan bir ah ku qaban doonaan, isla markaana aanay yeeli doonin in deegaannada Puntland noqdaan kuwo aan nabadgelyadooda la isku haleyn karin.

Labada gabdhood ee shalay lagu afduubay Boosaaso oo lagu kala magacaabo Pillar iyo Marcediz, isla markaana u kala dhashay dalalka Argentina iyo Spain, ayaa xilligii la afduubay waxay ku sii jeedeen xero carruurta lagu quudiyo oo ku taal xaafadda Raf iyo Raaxo ee bariga magaalada Boosaaso, wuxuuna afduubkani ku soo beegmay, iyadoo maalin ka hor gacanta kooxo afduubayaal ah laga sii daayay wariye Gwen Le Gouil oo u dhashay dalka Faransiiska, kaas oo markii la afduubay doonayay inuu ka soo warramo sida xeebaha ay uga baxaan dadka u tahriiba dalka Yemen.

Ugu dambeyntiina, magaalada Boosaaso ee Gobolka Bari, ayaa waxay u muuqataa mid aaney ku nabadgeleyn shaqaalaha ajnabiga ah, waxaana ka dillaacay kooxo budhcad ah oo qafaasha dadka ajaaniibta ah, iyadoo mar sii horreysayna rag hubeysani afduubteen diyaarad qaad geystay madaarka Boosaaso, inkastoo la sheegay in raggaas xurguf ka dhexeysay ganacsato qaadka ka baayacmushtarta oo diyaaraddaas kireysatay.

__

Source: Jamhuuriya
 

 
Printer Version