Erey Aan Ku Sagootiyayo Marxuum Yuusuf Axmed Xasan (Hero)
December 25, 2007

Naf waliba ta mowdka dhadhamisa weeyaan waa la kala horeynayaa uune, waa lays daba socdaa. Allaah igu og waan ka naxay geerida ku timi marxuum Yuusuf Axmed Xasan (Hero). Tabaashiirtii uu qaatay isagoo dooba'a ayuu god galay isagoo wali ku dhegan. Doobnimo macalinimaduu ku bilaabay ayuu ku godgalay. Mudaduu wax ka dhigayey dalkeena iyo dibadaba (EAU) kama yara 40 sano, macalinimada shaqo la qabtoo ka sharaf badan majirto. Waayo? Suubanoow Nabigeenii, Sallaa-LLaahu Caleyhi Wa Sallam, ayaa isku tilmaamay macalin. Marxuum Yuusuf, waxaanan iloobi karin, fadhiyo aanu wada yeelanay, oo dulucda sheekadayadu ay suugaan ahayd. Waxa layaabay, shicirka carabiga ah ee uu dusha ka hayey, gaar ahaan shaacir la yidhaa, Al- Mutanabbi. Waxa kale oo aan la yaabay heeso suudaniya oo uu af soomaali u tarjumay marxuum Ibraahim Jaamac Uurdoox oo aanan waligeey arag, hees hees lagu tarjumo oo dhadhankaa leh.

Waxaan ka qoray oo ayaan daradeyda, iga luntay, tix carabiya oo uu lahaa marxuum Cabdisalaan Haaji Aadan, cinwaankeeduna ahaa ("Maata Qalbii"). Cabdi salaan Xaaji Aadan oo isna xusuuso badan aanu wadaagno waayo 7-sano ayaanu isku kalaas ahayn, ayanan ogeyn inuu Af Soomaaliga mooyaane inuu af carabigana ku gabyo. Waxaan xasuustaa oo kale tix gaaban oo carabiya oon alifay oo anan isaga mooyi, weli nin kale aanan u akhriyin. Waxaan ka qorey marxuunka, aroor Daare-Salaam, anaga oo ka quraacanayna dhowr beyd oo ay tirisay gabadh layidhaa Timacad, oo kamid ahayd 5-tii haweenka ahaa ee uu ninkii wadaadka ahaa xukumay in dhagax lagu dilo.

Keydka suugaaneed ee uu marxuumku hayey, siduu ii sheegay waxaa ka mid ahaa 200 oo heesood oo duuban. Tix gaaban oo ingiriisiya oo uu alifay marxuunku oo sawiraysa xaalada qofku galo, markuu aad u qayilo, waanka yar waabanayaa inaan halkan ku xuso. Waayo, fadhi kooban oo in sheeka taqaanaa ay fadhido ayey ku qurux badan tahay in laga akhriyo. Marxuunku iskiisa ayuu u ahaa qoraa, waayo Xidigta Octoobar, ayuu ku qori jirey, sheekooyin taxana ah; kuwaas oo dhalinyaradu wiilal iyo gabdhaba si la yaab leh u sugi jireen, shaki in aanu ku jirin in sheekooyinkaasi ay aad sare ugu qaadeen, iibsigii Xidigta October.

Marxuun Yuusuf Axmed (Hero) oo ay sharaf ii tahay inaan ugu yaraan hal "term" macalin u ahaa, waxaan ku sagootiyayaa," noloshaadii macalinimo ayaad u hibeysay, abaal marintaada illaahay haka dhiggo janadii Fardowsa macalimiintaadii, ardeydaadii, eheladaadii iyo adigana Illaahay halkaa ha idinku kulmiyo. Aamiin.

Qoraalkii: A. Y. Ducaale.

 
Printer Version