|
Shirweynihii Ugu Horeyey Ee Ay Isugu Yimaadaan Haweenka Reer Somalilnd
December 25, 2007
Shirweynahii ugu horeyey ee ay ku kulmaan Haweenka reer Somaliland, ayaa maanta
ka futamay Hotel Ambassador ee magaalada Hargeysa.
Shirkaas oo uu soo qababqaabiyey dallada Ururada gaboodka NAGAAD, ayaa waxa ka
soo qaybgalay wufuud gaadhaysa 100 xubnood, oo kala yimi dhamaan Gobolada iyo
degmooyinka Somaliland, waxaana uu soconayaa muddo saddex maalmood ah.
Furitaankii shirkaas ayaa waxaa ka qaybgalay Wasiirka wasaarada Beeraha
Somaliland Md Aadan Axmed Cilmi dhoola-yare, Agaasimada guud ee wasaarada
Caafimaadka Anwar Maxamed Cige, Gudoomiyaha dallada NAGAAD Sucaad Ibraahim Cabdi
iyo xubno ka tarsan dalladaas.
Ugu horayn waxa halkaa ka hadashay Guddoomiyaha dallada haweenka ee NAGAAD
Sucaad Ibraahim Cabdi, oo sheegatay in shirkani uu yahay shirweynihii ugu
horeyey ee ay isugu yimaadaan Haweenka reer Somaliland, waxaana hadaladeedii ka
mid ahaa “Shirkani waxa weeyaan shirweynihii ugu horeeyey ee Haweenka Somaliland
isugu yimaadaan, inkasta oo ay NAGAAD shirarar badan qabatay, tababaro badanna
ay haweenka u samaysay, hadana shir la yidhi shirweyne guud, waa kii ugu
horeeyey ee Haweenka Somaliland isugu yimaadaan.” Ayey tidhi Sucaad Ibraahim, oo
intaa hadalkeeda raacisay mar ay ka hadlaysay ujeeda shirkaas la isugu yimi
“Ujeedooyinka shirkan laga leeyahay waxa weeyaan, in la is waydaarso aaraada iyo
fikradaha ay qabaan Haweenka reer Somaliland ee ku kala nool gobolada dalka, si
la isula jaan-qaado, gaar ahaan arrimaha la xidhiidha xagga siyaasada, arrimaha
bulshada iyo kuwa ganacsiga.”
Marwo Sucaad waxa ay tilmaantay in shirkani kaga duwan yahay shirarkii ay awal
hore u qaban jireen, iyaga oo xubnaha shirka isugu yimi ka soo xulay ilaa
degmooyinka iyo tuulooyinka dalka. “Runtii shirkani wuu ka gedisan yahay
shirarkii aanu qaban jirnay, mar keliya waxaanu aad u gaadhnay oo tagnay baanu
is leenahay ilaa degmooyinkii hoose, oo Gobol walba magaalo madaxda uun kuma
koobna, waa 100 haweena oo intooda badani waxa ka yimaadeen Gobolada, waxaana ay
ka kooban yihiin heer degmo ilaa heer tuulo. Waxaana aanu rajaynaynaa in uu
xidhiidhku intaa ka sii socdo, oo ilaa heer xaafadeed la sii socdo. Ujeedada loo
gasocdaana waxa weeyaan in shirka ay ka soo baxaan Ajande ay dumarku lee yihiin,
oo laga hana-qaadi karo, oo haweenka Somaliland lee yihiin.” Ayey tidhi Sucaad
Ibraahim, oo sheegatay in inta badan dallada haweenka NAGAAD ay ku hawlan tahay,
sidii ay haweenka ugu fududayn lahaayeen ka qaybgalka talada dalka iyo doorka
siyaasada dalka.
Wasiirka Wasaarada Beeraha Somaliland Md Aadan Axmed Cilmi (Dhoola-yare) oo isna
shirkaa ka hadlay ayaa sheegay in ay Xukuumad ahaan ku dhiiri-gelinayaan
Haweenka Somaliland wax kasta oo ay wax ku qabsanayaan. “Aad iyo aad baanu
idinku mahadanaqaynaa, waana aanu idinku dhiiri-gelinaynaa wax kasta oo ay
haweenku wax ku qabsanayaan, iyaga oo aynu ognahay in ay yhiin laf-dhabarta
bulshada dalka.” Sidaa ayuu yidhi Aadan Axmed Cilmi Dhoola yare, oo intaa
raaciyey in dumarka reer Somaliland ay talada dalka ka soo dhex muuqayaan
muddooyinka dambe, isla markaana waaxa uu tilmaamay in doorashadii Golaha
Wakiilada ee ugu horasay ay ku soo baxeen labada haweenka ee ka mid laba iyo
sideetanka xubood ee Golahaas, isaga oo arrimahaas hadlaayana waxa uu yidhi
“Inagu hadii aynu reer Somaliland nahay doorashadii ugu horaysay ee lagu soo soo
doortay 82-ka xubnood ee Golaha Wakiiladu ka koobayahay, laba xubood oo dumar ah
ayaa ku jira, taas waxa aad arkaysaan sida ay bilawga inoogu tahay, marka la
eego boqolkiiba inta ay ka soo galeen in ay tahay wax fiican.”
Waxaa kaloo Wasiirku uu ku baraarujiyey Haweenkii shirkaa ka soo qaybgalay in ay
ku dadaalaan sidii ay u soo saari lahaayeen awlaad leh tarbiyadii waalidnimo, si
ay uga qaybgalaan ayuu yidhi geedisocodka horumarka dalka.
Ugu dambaytii waxaa isna shirkaa ka hadlay Agaasimaha guud ee Wasaarada
caafimaadka Awar Maxamed Cige, oo sheegay in wasaarada caafimaadku ay tahay
wasaarada keliya ee masuuliyada ugu badan ay dumarku hayaa. “Horta Wasaarada
caafimaadku, hadaad si u eetgo waa wasaarada keliya ee masuuliyada ugu badan
dumarku hayaan, haday waxa MCH wadanku leeyahay iyagaa maamula, haday tahay
Cusbitaalo. Waxaanu ugu door bidnay in ay MCH-yadaa maamulaan, hadii aani u
dhiibno nin, waxaanu ognahay in aanu MCH-ku jirayn, oo wiixii yaraa ee maasha
yaalayba uu qaad siisanayo.” Sidaa ayuu yidhi Anwar Maxamed,
Waxaa kaloo uu xusay Agaasimuhu in Wasaarad ahaan hawsha ugu badan ee ay qabtaan
ay ku tacaluqdo adeegyada caafimaad ee la xidhiidha haweenka iyo caruurta,
waxaana uu haweenkaas u soo jeediyey in ay haween ahaan iyagu la yimaadaan
dadaal ku salaysan danahooda, isla markaana ay iska saaran fikrada ah waad la
idin garbinayaa.
__
Source: Hadhwanaag News
Printer Version
| |
|
