Shirweynihii SSE-da Oo La Soo Gebogabeeyay Iyo Qoddobadii Lagaga Dooday
December 25, 2007

Shirweynihii ururka xidhiidhka Jaalliyadaha Somaliland ee Qaarada Yurub oo maalintii Sabtidii ee 22-ka December,2007, uga furmay ururada Jaalliyada duleedka magaalada Utrecht ee Holland, ayaa waxa maalintii Axadii ka qaybagalyaashii shirku si aada uga dooodeen qoddobo dhawr ah oo muhiim ah. Haddaba waxa warbixintan nooga soo diyaariyay weriyaha Jamhuuuriya ee London Khadar Xasan cali.

Shirkan oo dib la isku soo noqday aroornimadii maalinimadii Axadii saacadu markay ahayd 09:00 subaxnimo ayaa waxa uu ku bilaabmay qaab siminaar waxaanay ergooyinkii ka qayb galayay isku qaybiyeen saddex kooxood oo si cilmiyeysan uga soo dooda, ugana soo baaraan dega qoddomada kale ah:

Horumarinta Bulshada
Xuquuqda Aadamaha Iyo Saxaaafada
Aqoonsi Raadinta

Doodaasi ka dibna waxa ay kooxaha ka qayb qaadanayay shirweynaha u soo bandhigeen aragtidooda ku aadan sidii wax looga qaban lahaa arrimaha horumarinta, xuquuqda aaadamaha & Saxaafada iyo aqoonsi raadiska, taasi oo ay ku soo ururiyeen warbixin qodobaysan oo nuxurkeedu ahaa sida ay u arkaan in wax looga qaban karo arrimahan dhawrka ah. Kooxdii ka soo dooday Horumarinta Bulshada waxay isla soo qaadeen sidii loo badhi taari laha tacliinta sare ee Jaamacadaha, iyadoo wada shaqayn lala yeelanayo Jaamacadaha Yurub si ay suurtagal ugu noqoto aradayda reer Somaliland in ay helaan Shahaadado caalami ah oo dunida laga aqoonsan yahay. Dhiirigalinta waxbarashada Internetka iyo waliba in lagu baraarujiyo aqoonyahanada reer Somaliland ee qurba jooga ahi in ay xirfadahooda iyo aqoontooda uga soo faa’iideeyaan dadkooda iyo dalkooda. Horumarinta caafimaadka, tayaynta maamulada rugaha caafimaadka iyo cisbitaalada ayaa iyana hoosta laga xariiqay. Waxaanay xuseen sida ay loogu baahan yahay in dad shaqo loo abuuro, taasi oo ay tilaameen ka qayb galayaashu in ay wax weyn ka tari doonto mashaakilaadka bulsho iyo dhaqaale ee dadka reer Somaliland haysa.

Qoddobka Xuquuqda Aadamaha iyo saxaafada ayaa isna si aada looga dooday, waxaanay sooo jeediyeen kooxda aqoon isweydaarsiga ka qayb qaatay sida loogu baahan yahay in kor loogu qaado xuquuqda Aadamaha, taasi oo sida ay xuseen ay waajib ay tahay in culeys lagu saaro xukuumada Somaliland sidii ay u ixtiraami lahayd xuquuqda aadamaha. Waxa kale oo ay ugu baaqeen in komishanka qaranka ee xuquuqda aadamahu inuu noqdo mid dhexdhexaada oo ka madax banana xukuumada Somaliland . Sidoo kale waxa dooda ka soo baxday in loo baahan yahay sidii kor loogu qaadi lahaa wacyigalinta hayd’aha ay khuseyso xuquuqda aadamuhu iyowaliba in shacbiga reer Somaliland lagu baraarujiyo in ay xuquuqdooda bartaan. Dhinaxa saxaafadana waxay carrabka ku adkeeyeen in ay muhiim tahay in saxaafadu aanay xadka dhaafin oo ay noqoto mid had iyo jeer danta guud difaacda. Sidoo kalen waxay u soo jeediyeen xukuumada Somaliland in ay ixtiraamto xeerka saxaafada ee gollaha wakiiladu ansixiyeen iyo xeerka anshaxa saxaafada.

Derder galinta iyo ka shaqaysiinta gudida ixtraaf raadinta ee SSE ayaa iyana si aada loo falanqeeyay waxaana la isla qaatay in la xoojiyo xidhiidhka Jaalliyadaha iyo muadanayaasha baarlamaanka iyo wasaaradaha arrimaha dibada ee dalalka ay degan yihiin xubnaha jaalliyaduhu, iyadoo laga faa’iideysanayana saxaafada kale duwan.


Intaasi ka dib waxa shirka warbixin dheer uu ku saabsan waxyaabihii u qabsoomaya guddida fullinta ee SSE iyo kuwa aan u qabsoomi halkaasi ka soo jeeediyay gudoomiyaha SSE Md Cabdiraxmaan Cabdilaahi Jibriil. Gudoomiyuhu waxa uu ku amaanay ururada Jaalliyadaha reer Somaliland ee Yurub dedaalka ay ugu jiraan horumarinta dalkooda iyo mashaariicda wax ku ool ka ah ee ay sannad kasta ka fullinyaan dalkooda hooyo. Waxaanu xusey waxyaabaha sannadkjii tagay u qabsoomay guddi ahaan in ay ka mid yihiin dhaqaajinta webka dallada, siminaaro iyo kullamo ay u sameeyeen ururada reer Somaliland ee London si ay isku xidh u yeeshaan dhexdooda ah, daraasaad kale duwan iyo qiimeyn ilaa shan ah oo gudoomiye xigeenka SSE ay ku soo samaysay qaar ka mid ah hay’addaha dowliga ah iyo kuwa aan dowlaiga ahaynba. Waxaanu intaasi ku daray in wali guddida fullinta ay qorshaha ugu jirto furitaanka xafiiskii Somaliland Support Office ee Brussels si looga faa’iideyso xarunta EU-da ee halkaasi ku taalla, iyadoo laga duuleyo shirkii sannadkii hore ee SSE-da ee lagu qabtay magaalo madaxda dalka Belgium ee Brussels. Gudoomiyuhu waxa kale oo carrabka ku dhuftay in SSE sii xoojin doonto xidhiidhka au la leedahay xukuumada Somaliland , waxaanu ku nuuxnuuxsaday sida loogu baahan yahay in xukuumaduna dhankeeda ay wada shaqayn la timaado. Gudoomiyuhu waxa ugu danbeyntii uga mahadcelin u soojeediyay ka qayb galayaashii shirka, Xildhibaan Maxamed cali oo ka tirsan guddida taakuleynta iyo dibu dhiska gobilada Bari, labada urur ee martigaliyay shirka (Global Society Foundation & Nomad Holland ), saxaafada madaxa banana ee Gebiley Net, Jamhuuriya iyo Radio Hormood,

Warbixintaasi ka dibna waxay ergooyinkii shirku si cilmeyaysan uga u lafo gureen sidii derder loo galin lahaa hawlaha dalada SSE isla markaana xoog loo saari laha dhinacyada horumarinta iyo waxqabadka.

Gebogabadii shirka waxa ereyo kooban oo dhiirigalin mahadnaqa ka soo jeediyay Xildhibaan Maxamed Cali oo tirsan xisbiga mucaaridka ah ee KULMIYE, isla markaa ka mid ah guddida taakeynta ee dib u dhiska Gobolada bari , waxaanu ku amaanay SSE-da dedaalka ay ugu jiraan horumarinta dadkooda iyo dalkooda.

Shirkan oo ku dhamaaday jawi is afgarad iyo walaatinmo badana ka muuqatay waxa ka soo qayb galay ergooyin matalaya jaalliyadaha Belguim, Denmark , Finland , France , Germany , Holland , Italy , Norway , Sweden , UK iyo ururka Aafaraad Internation.

Dhamaana waxay dadkii ka qayb galay shirku mahadcelin balaadhan u soo jeediyeen jaalliyada reer Holland oo ay hormood u yihiin Ismaaciil Cawl iyo Maryan gabay sidii sharafta lahayd ee ay ugu dedaalaan martigalinta shirka oo ay dejiyeen Hotel ku yaalla duleedka magaalada Utrecht.

__

Source: Jamhuuriya

 
Printer Version