Ururka QARAN iyo KULMIYE Oo Mawaaqiif Adag Wada Gaadhay
December 25, 2007

Ku-simaha Guddoomiyaha iyo masuuliyiinta sare ee xisbiga mucaaradka ah ee KULMIYE, ayaa xalay xaflad casho-sharaf ah ugu sameeyey hoteelka Imperial ee magaalada Hargeysa madaxda urur-siyaasadeedka QARAN ee dhowaan ka soo baxay xabsiga Madheera.

Casuumaddan oo ay ka qaybgaleen Guddoomiye-ku-xigeenka 1aad ee Golaha Wakiillada, Md. Cabdicasiis Maxamed Samaale, xildhibaanno ka tirsan Aqalka Wakiillada iyo marti-sharaf kale oo aad u tiro badan, ayaa waxa labada dhinac isku waydaarsadeen hadallo isugu jiray mahadnaq, abaal-celin, isgarabtaag iyo ballanqaadka abaalgud shaqsiyaad, kuwaas oo labada geesood isaga mahad-celiyeen gudashada waajibaadka siyaasadeed ee u dhexeeyey.

Ku-simaha Guddoomiyaha xisbiga KULMIYE, Md. Maxamed Cabdi Aadan (Iskeerse), ayaa isaga oo badheedhihiisa ka dhiibanayey munaasibaddaa waxa uu muujiyey sida xisbigoodu uga soo horjeeday xadhiggii lagula kacay madaxda ururka QARAN iyo dhibaatadii muddadii ay xidhnaayeen soo gaadhay qoysaska saddexda hoggaamiye, isla markaana waxa uu sheegay in KULMIYE diyaar u yahay inuu ururka QARAN kala hawlgalo abaabul kasta oo dalka lagu badbaadinayo oo xilka lagaga qaadayo maamulka hadda jira.

Sidoo kale, Dr. Maxamed Cabdi Gabboose oo ah Guddoomiyaha Ururka QARAN oo xafladdaa ka hadlay, ayaa qiray doorkii xisbiga KULMIYE ka qaatay xadhiggooda, isaga oo taas maskaxda ku hayana ay KULMIYE abaalgud uga dhigi doonaan inay kala shaqeeyaan jiritaanka xisbigooda.

“Waxaan idiin ballanqaadaynaa laga bilaabo caawa [xalay] in aannu ka shaqayno sidii KULMIYE u dhismi lahaa,” ayuu yidhi Dr. Gaboose.

Hadalladii masuuliyiinta labada dhinac xafladdaa ka jeediyeenna waxay iyaga oo faahfaahsan u dhaceen sidan:

Kusimaha Guddoomiyaha Xisbiga KULMIYE Md. Maxamed Cabdi Iskeerse

“Annagu uma tacsiyadaynayno mujaahidiintaa xidhnaa ee waxaannu ka tacsiyadaynaynaa dhibaatadii gaadhay xaasaskooda iyo carruurtooda, albaabadii caddaalad-darradu taallay ee maalin walba ay taagnaayeen iyagoo warqad yar raadinaya, safaradii ay galayeen, daawadii iyo cuntadii ay ka ilaalinayeen kulaylka ama qabowga, gurhaya iyo carruurta dayacantay, kuwaas bay ahaayeen kuwa aannu ka murugaysnayn, ragga xadhigga waa loo sameeyey oo madax bay ku noqdaan, Ilaahay waxaannu ka rajaynaynaa inay madax ku noqdaan.

Haddii Daahir Rayaale inta la soo qaaday uun aayar la caleemo saaray, dhadhankeeda iyo dhibaatada ay leedahay baannu garanayn, maalinba siduu tallaabo u qaadayey Siilaanyo oo uga hadhay 80 cod badbaadada dalka, ayuu toddobadaadkii ku xigay wasiiradiisa ku yidhi waxaad tidhaahdaan wuxuu dilay Aadan-shiine iyo Cabdiqaadir Koosaar, haddii aynaan iminka halkaa aynaan kaga hortagin meel ka xun bay innala gaadhi, dulqaadku ummadda iminka wuu ka dhammaaday wuxuu taagan yahay xawlal-mariidka, sidii Maxamed Xaashi sheegay hadal wuu dhammaadoo waxba tari maayo, annagu barito laga bilaabo ururka QARAN-now diyaar baannu u nahay in aannu idinkala hawlgalno sidaynu abaabul u gali lahayn ee aynu dadkeena u habayn lahayn ee waxan aynu uga hortagi lahayn, guddiyo ayeynu samayn doona. Dhulka dimuqraadiyaddu jirto ninka madaxda ah inta la is hortaago ayuun baa la yidhaad soo bax, waa in aynu gaadhsiinaa waar soo bax oo na soo dhaaf xabbadna ridimaynee, taa waa in aynu ummadda gaadhsiinaa,” ayuu yidhi Md, Maxamed Cabdi Iskeerso.

Guddoomiyaha urur-siyaasadeedka QARAN, Dr. Maxamed Cabdi Gabboose:

“Marar badan baa hadalka waxa ka qiimo badan in aad iska aamusto, waayo dareenka gudaha waxa cabiri kara aamusnaanta. Xisbiga KULMIYE waxa uu ahaa markaanu bilownay mashruucan in ummaddu urur-siyaasadeed isku habayso kii ugu horreeyey ee ummadda u banaamiyey sharciyan in ay xaq tahay Siciid Cilmi Rooble ayuu ahaa oo KULMIYE ah, waxay muujinaysay kalsoonida ay isku qabaan iyo ta ay u qabaan dimuqraadiyadda, waxay muujinaysa dhaqankii SNM ee ahaa in aan kursiga lagu dhagin. Xisbiga KULMIYE nagagama hadhin intaa ee markii nala xidhay dhawaaqii u horreeyey ciddii ay ka soo yeedhay waxa uu ahaa Axmed-siilaanyo ilaa maalintii nala soo daayeyna KULMIYE nagama hadhin, xaqiiqdu saddexdayada maaha ee dadka hogaaminaya ayaa u abuuran taariikh-nololeedkoodii halgan waxa xorriyaddu tahay iyo waxay ka dagaallameen, waxaan xusuustaa markii aannu xidhnayn maalmihii hore waxaannu ku jirnay qol daaqado waaweyn leh, maalin goor barqo ah oo daybal xooglihi dhacayso, markaasaan arkay Maxamed Xaashi Cilmi oo maro yari dusha ka saarran tahay oo siigadu ku dul dhacayso, kaligay baan waxaan dib u gocday intii sanno ee uu soo xorraynayey dalkan iyo meesha uu ku dambeeyey iyo cidda ku xidhatay oo uu oggol yahay, uma qaadan nacasnimo, waxa uu siigada u jiifay in wada hadal lagu xaliyo, Rayaale taa wuu garan waayey.

Markaannu soo baxnay raggii qiimaha lahaa ee QARAN hoggaaminayey waxay yidhaahdeen, waxaannu leenahay ehel iyo cid qiimaha ay noogu fadhiyaan tahay mid culus, waa xisbiga KULMIYE ee sidaa ogaada, waxaan caawa [xalay] hortiina idiinka xaqiijinayaa nolosha inta ka hadhay inaynu wada soconayno, waxaan idiinku xaqiijinayaa haddii ururka la oggolaado iyo haddii aan la oggolaanba hiilkaad noo gasheen mid ka weyn in aannu idiin galno, waxaannu idiin ballanqaadaynaa laga bilaabo caawa [xalay] sidii KULMIYE ku dhismi lahaa in aannu ka shaqayno. Waxa la leeyahay urur ahaan uma jirtaane Rayaale ayaad lugta qabanaysaan oo KULMIYE ayaad dhisaysaan, waa run baannu leenahay, cidna uga baqimayno Rayaale inuu meesha ka baxo, wanaaggii loo galay abaalkiisii ma gudin, xushmadii iyo karaamadii loo qaaday wuxuu ku abaalguday inuu sharciga, xuquuqda muwaadinka iyo haybadii waddankan ku tunto, habeen dhawayd baa la waydiiyo waan xidhayaa ayuu yidhi, markaa luuqada dhaqankiisu waxay noqotay waan xidhayaa. Waxaan leeyahay xisbiga KULMIYE, Golaha Wakiillada ee Cabdicasiis iyo xubnaha kale innagala joogaan iyo shacbi-weynahaba, dagaalkii yaraa baa dhammaaday oo kii weynaa baa hadhaye in nalaga siiyo gacantii hore mid ka weyn, waxa nalagu xukumay 101 xeerka ciqaabta guud ee Soomaaliya Muqdisho 1962, xeerkaa waxa laga soo dheegtay xeerka ciqaabta guud ee Talyaaniga oo Musalini saxeexay 1930-kii.

Qodobkaasi waxa uu leeyahay shan sanno saddexdayadu [hoggaanka QARAN] cid ma dooran karno, cidna nama dooran karno, doorashana kama qaybgali karno, xisbina ma gali karno, arrimo siyaasadeedna gacanta lama gali karno, muwaadinimadii halkaasaa nalagaga qaaday, markii lana soo daayey waxaannu dalbanay warqadii lanagu soo daayey, waxa nala yidhi salaadiin baa isxilqaantay oo arrinka gashay, xalay [habeen hore] ayuu hadlay Madaxweyne Rayaale, waxa uu yidhi waxaan ka saamaxay afarta gidaar inay ka soo baxaan, haseyeeshee waxa laga qaaday oo laga xayuubiyey xuquuqdoodii siyaasadeed ee ay dalka ku lahaayeen. Dastuurka waxa iigu qoran in aan xaq u leeyahay siyaasadda dalka in aan ka qaybgalo, xeerkii Musalini-na waa la igaga qaaday ma Somaliland baa waalan mise Musalini baa ina xukuma, haddii dastuurku xaq nasiiyey qodobka uu Rayaale adeegsaday waa maxay ilayn isaga ayaa na aftuubee oo Garsoorka, Xeer-ilaaliyaha, Bangiga wuxuba waa isaga. Markaa waxaannu leenahay kalgacaylka aannu dalkeenna u hayno gefka intaa le’eg ma qaadan karnee arrintaa ha laga hawlgalo.

Saansaamaha muuqda oo dhan waxay u muuqataa in aan doorasho dhacay sidii loogu talogalay, Komishanku waa kuwa laydhkii laga jaray shaqo ay kuu qabtaan iska daayoo,” ayuu Dr. Gaboose hadalkiisa ku soo gunaanaday.

__

Source: Jamhuuriya

 
Printer Version