Ilaalada Yuusuf Dabageed Oo Dagaal Kula Wareegay Saldhiga Booliska B/weyn Oo Ay Gacanta Ugu Jirto Ciidamo Boolis Gadoodsanaa
December 24, 2007

Ilaalada Gudoomiyaha Gobolka Hiiraan Yuusuf Dabageed ayaa barqnimadii maanta dagaal kula wareegay Saldhigal Booliska Magaalada B/weyn, oo ay gacan ku heyntiisa shalay la wareegeen Ciidamo Boolis gadooda.

Dagaalka oo socda 15 daqiiqo ayaa la isku adeegsaday Hubka noocyadiisa kala duwan ee ka dhaca qoryaha fud fudud, iyadoo Ilaalada Yuusuf Dabageed ay aaqirkii ku guuleysteen in ay Saldhiga ka saaraan Ciidamadii gadoodsanaa ee ka cabanayay mushaar la'aanta.

Labo ka mid ah askarta heysatay Saldhiga ayaa dhaawacantay sida ay sheegayaan wararka aanu ka heleyno Magaalada Beled weyn, iyadoo Xaalada Magaaladaas ay tahay mid degan.

Shalay ayay aheyd markii Ciidamo Boolis ah ay xoog ku qabsadeen saldhiga Booliska Degmada B/weyn, kadib markii Ciidamadaas ay cabasho ka sameeyeen mushaar la'aan soo wajahday.

__

Source: Jowhar

 
Printer Version