Aragtida Guddiga Diiwaangelinta
December 24, 2007

Saddexda xisbi qaran ee dalka ayaa sida ku qeexan lambar 14 uu dhigayaa in jiritaankooda xisbinimo uu dhan yahay muddo 5 sanno ah, taasoo ku eg maanta oo ay bishu tahay 23 December 2007, iyadoo isla markaana dib loo riixay waqtigii ay qabsoomi lahayeen doorashooyinka golayaasha deegaanka oo ahayd inay qabsoomaan 15-kii December ee sannadkan.

Golayaasha Degaanka iyo ta Madaxtooyadaba dib u dhiggooda waxa isla qaatay saddexda sixbi qaran, kadibna si loo sharciyeeyo dib u dhiggaas labada doorasho, ayaa la mariyey Golayaasha sharci-dejinta, kuwaas oo iyana ku ansixiyey siday ku soo heshiiyeen axsaabta qaranku, iyadoo ta Golayaasha Degaanka dib loogu riixay July, 2008, ta Madaxtooyadana dhammaadka August, 2008.

Haddaba, maadaama saddexda xisbi Qaran muddadoodii hawlgal ee sharciga ahady dhammaadeen, ayaanu wax ka waydiinay madaxda xisbiyada UDUB, KULMIYE iyo UCID, waxay yeelanayaan. Ugu horreyn waxaanu su’aashaas u bandhignay Ku-simaha Guddoomiyaha xisbiga KULMIYE Mudane Maxamed Cabdi Aadan (Iskeerse) waxaanu kaga jawaabay oo uu yidhi; “Horta guddidii diiwaangelintu ma jirto, meelna uu ka dhacayna lama oggola, sharciguna ma caddayn oo muu odhan muddadaas ka axsaabi ma jiraysso. Axsaab la furayna ma jirto, markaa waxay tahay in sida Lubnaan la yidhaadhdo waqtigii dhammaaye, hala sugo doorasho inta ay dhacayso, taasina waa uu la sameeyo guddidii diiwaangelinta.

Ilaa haddana dawladda ayaa hortaagan, inta axsaabta la furayo oo kuwo kale ka soo baxayaan, kuwaas hore ayuubaa jiraya, haddii la furana annaga oo KULMIYE ah ayaa ka qaybgaelayna tartanka.”

Md. Iskeerse oo ka jawaabayey sida xisbinimadoodu ku xalaaloobayso, maadaama muddadii sharciga ahayd ay kaga eegtahay beri, [Maanta] waxa uu yidhi; “Waddanku ma xisbi mucaaarad la’aanayo, haddii ciddii samayn lahayd [guddi diwaangelinta] aanay jirin, waannu jirayna.

Dimuqraadiyad aan axsaab mucaarad lahayn dimuqraadiyad ma noqon karto, haddii ay taas dhacdana, waxay noqonaysaa mid keligeed talis ah, haddii kalena waa in la samaeeyaa gaddidii diiwaangelinta.”

Sida oo kale, Ku-simaha Guddoomiyaha xisbiga UCID, Md. Aadan Mire Waqaf oo ka jawaabayey mawqifkooda ku aadan maadaama mudadii shanta sanno ahayd ee sharciyadda xisbigoodu dhamaatay, waxa uu yidhi; “Horta, su’aashaas haddii aad iweydiisay, guddigii waqtigoodii wuu dhammaaday, wax dambe oo qaabkii hore loogu doortay dib loogu dooranayaa ma muuqato.

Mar haddii guddidaas sidaas wax u soo habayn jirtay aanay jirin, waxay ila tahay in aynaan waxba iska weydiinayn arrintaas.”

Sidoo kale, Xoghayaha siyaasadda ee xisbiga talada haya ee UDUB, Md. Cumar Jaamac Faarax, oo isna faah-faahinayey aragtida xisbigooda ee ku wajahan arrinta waxa uu yidhi; “Kadib markii aynu qaadanay habka xisbiyada badan, waxa la sameeyey guddiga diiwaangelinta ururrada siyaasadda ka qaybqaadayn, waxana loo sameeyey hawl cayiman iyo waqti kooban oo ahaa lix bilood waxay ahayd inay kala reebaan ururrada siyaaasadda, si ay u soo baxaan saddex xisbi qaran, oo ka jiri doona waddanka sida dastuurku sheegayo.

Ma jiro waqti cayiman oo loo qabtay saddexda xisbi qaran, mana jirto meel ay ku dhacayso shahaadadii la siiyey.

__

Source: Jamhuuriya

 
Printer Version