|
|
NEWS
|
|
|
CASUUMAD, CANAAN MALDAHAN IYO CABASHO QAYAXAN
December 21, 2007
(SOHTA - Hargeysa) Madaxda xisbigga UCID ayaa shalay casuumad soo dhaweyna, u
fidisay siyaasiyiintii Ururka Qaran ee xabsiga laga soo daayay. Casuumadaa waxaa
ka soo qayb galay madaxda iyo xubnaha labada dhinac. Casuumadaa oo ka dhacday
Hadhwanaag Hotel, xoghayaha Arrimaha Dibada ee xisbigga UCID, ayaa furay, intaan
cuntadiiba la bilaabin, kadibna hadalkii siiyey gudoomiyaha UCID, Faysal Cali
Waraabe.
Gudoomiyah UCID wuu soo dhaweeyay sii deynta siyaasiyiinta Ururka Qaran, waxaanu
muujiyey in ay ku faraxsan yihiin isaga iyo xisbigiisuba, xorriyadooda dib ugu
soo noqotay. Intaa waxuu raaciyay iney waajib tahay in dastuurka iyo xeerarka
dalka loo hoggaansamo, oo qofkii ama kooxdii wax tabaneysa ay xuquuqdeeda u
marto jidadka dastuurka iyo xeerarka aynu dhiganay. Wuxuu tibaaxay in aan cunfi
la adeegsan si xuquuqdaa loo helo. Intaa waxuu raaciyey in dulqaadku, had iyo
jeer u wanaagsan yahay iney xukuumadu la timaado.
Hadalkiisa isagoo sii watey, wuxuu tilmaamay, wixii khilaafa ee dhexdeena ka
dhasha in wada hadal lagu dhameeyo. Isbadel siyaasadeed iyo ku dhaqaale labadaba
waa loo baahanyahay, laakiin waa in ay ku yimaadaan qaab dimuqraadiya oo aynu
iska ilaalino, in dadka la kiciyo, ayuu yidhi. Wuxuu kusoo gaba gabeeyey
hadalkiisii in danta qaranka laga hormariyo danta xisbiga iyo ta shaqsiga ahba.
Dr. Gaboose Gudoomiyaha Qaran oo si qaboow oo diblomaasi ah uga hadlay waxuu
tibaaxay, inkasta oo ay cabasho ka qabeen, mowqifkuu iska taagay, xadhigoodii
Gudoomiyaha UCID, innay cabashadaa waxoogaa khafiifisay, gudoomiyaha UCID oo
ahaa, gudoomiyihii ugu horeeyy ee nagu soo booqday xabsiga iyo gudoomiyihii ugu
horeeyey ee na marti qaaday markaan xabsigga ka soo baxnay.
Gudoomiye Gaboose, wuxuu tibaaxay ereyadan iyaga lagu leeyahay, dastuurka iyo
xeerka u hogaansama, iney waajib tahay in lagu yidhaahdo Madaxweyne Riyaale
waayo waa isaga ninka xeerka jabiyey ee dastuurka garab maray. Wuxuu intaa
raaciyey,iney Maxkammada dastuuriga ah qoraal u qoreen ku saabsan xaqa ay u
leeyihiin, inay is abuubulaan oo ay urur furtaan, markey la tashadeen qareeno,
laakiin jawaab ilaa imika maya iyo haa midna aanay helin. Wuxuu cadeeyey inney u
hoggaansami lahaayeen wixii jawaab uga soo noqda, immikana in aanay qaanuunka
kaweyneen. Dhaliilo dhawr ah ayuu u jeediyey Xukuumada iyo Golaha Wakiilada oo
ka baaqday, innuu guto waajibaadkiisii.
Guddoomiye ku xigeen Maxamed Xaashi Cilmi ayaa intaa ku daray in dulmi iyo
gardaro lagu xidhay. Mawqifkii gudoomiyaha UCID Faysal Cali Waraabe aanu u
cuntamin yahay ahaana midey aqbali waayeen. Wax uu intaa raaciyey, Gudoomiyuhu
immika markuu nala hadlayeyna waxaad moodeysay innuu Riyaale nala hadlayo, waxa
uu intaa raaciyey abti Faysalow, kaamanaan iibsan mowqifkaa, waliba anoo kuu
codeeyay doorashadii.
Printer Version
| |
|
|