Markab kuwa xoolaha qaada ah oo shixnad adhi ah ka qaaday Dekedda Berbera ayaa la sheegay in lagu rogay Dekedda dalka Jamhuuriyadda Jabuuti.

Markabkan oo u rarnaa ganacsato Soomaali iyo Carab ah ayaa toddobaadkii hore Dekedda Berbera ka qaaday shixnad 8000 neef oo adhi ah, ayaa la sheegay in lagaga rogay Dekedda magaalada Jabuuti.

Warar xogogaal ah oo ku dhowdhow maamulka Dekedda Berbera ayaa sheegay in xoolahaasi dekedda kaga baxeen in loo dhoofinayo magaalada Jeddah ee dalka Boqortooyada Sucuudi Carabiya, balse aan la geyn halkaas ee

 lagu rogay Jabuuti.

Markab labaad oo dekedda Berbera shixnad 3500 neef oo adhi ah ka qaaday Sabtidii toddobaadkan, ayaa isagana lagu wadaa in lagu rogo Jabuuti oo uu hadda taagan yahay duleedka dekedda Jabuuti.

Haddaba, iyada oo lagu jiro xilligii moosinka gudashada waajibaadka Xajka oo tan iyo markii dawladda Sucuudigu xayirtay xoolaha Soomaalida sannadkii 1991-kii aanay jirin xoolo si toos ah u galay dekedaha Sucuudiga, haddana waxa xoolaha Somaliland loo diraa dalalka Yemen iyo Imaaraadka Carabta.

Ilaa hadda ma jiraan warar rasmi ah oo ay xukuumadda Somaliland ka soo saartay mowqifka ay ka qabto in xoolaha ka dhoofa Dekedda Berbera la sii mariyo Jabuuti. Warku waxa uu intaa ku daray in ay hadda Berbera ku sugan yihiin xoolo kale oo sugaya in loo qaado dhinaca Jabuuti.

Dawladda Jamhuuriyadda Jabuuti ayaa sannadahan u dambeeyey ku hawlanayd sidii dekedeedu u noqon lahayd marinka xoolaha ee Geeska Afrika, iyada oo hore uga dhistay xeryo lagu baadho caafimaadka, laguna nasiyo. 

Source: Jamhuuriya