Maxkamadda Hargeysa oo Xukunno Culculus ku Ridday Eedaysaneyaal ay ku Heshay Falal Argagixiso
December 10, 2006
 

Hargeysa (Jam)- Maxkamadda Gobolka Hargeysa ayaa shalay xukunno calculus oo ah xadhig u dhexeeya 20-25 sannadood ku ridday 11 maxbuus oo ay sheegay in lagu helay falal argagixiso iyo dembiyo lagu wiiqayo jiritaanka Somaliland.

Garsooraha dacwadda qaadayey Cabdiraxmaan Jaamac Hayaan, oo go’aanka maxkamaddu ka gaadhay kiiska ku furto), ayaa shalay lagu xukumay 25 sannadood oo xadhig ah.

Ammaanka maxkamadda oo shalay ahaa mid si weyn loo adkeeyey ayey ka qaybqaateen ciidamo tiro badan oo wata gaadiid tikniko ah, iyada oo isla markaana baadhis xoog leh lagu samaynayey dadka ka qaybgelaya dhegaysiga dacwadda oo ahayd mid furan, sidaa daraadeedna loo oggolaaday tiro dadweyne oo kooban, qaar ka mid ah ehalada maxaabiista iyo suxufiyiinta.

Guud ahaan dhaqdhaqaaqa dadka iyo gaadiidka ayaa aad loo xaddiday, mana jirin wax dacwado ah oo ka socday maxkamadda shalay.

Abbaaro 8:30 subaxnimo ayey dadweynuhu ku xeroodeen hoolka maxkamadda ee dacwadda lagu qaadayey. Maxaabiista dacwadda lagu qaadayey oo dhammaantood lebbisnaa dhar isku mid ah, marka laga reebo hal nin oo xidhnaa Khamiis dheer oo midabkiisu yahay bunni, oo ay go’yaal cadcad ka dul huwanaayeen iyo koofiyado nooca muslimku qaato oo leh layman madmadow oo caddaan u dhexeeyo, kuwaas oo laba-laba isugu xidh-xidhan ayuu garsoorihii maxkamaddu kiiskoodii bilaabay 10:26 daqiiqo, isaga oo akhriyey marxaladihii kala duwanaa ee ay soo martay dacwaddu.

Garsoore Cabdiraxmaan Jaamac Hayaan, waxa uu sheegay in la qabqabtay 21-kii September 2005, isla markaana qaadista dacwadoodu socotay muddo toddoba bilood ah oo ka bilaabmaysay 23 May 2006 ilaa 9 November 2006, “Iyada oo,” ayuu yidhi; “ay maxkamaddu yeelatay 22 fadhi, halka afar fadhi oo kalena ay qabsoomi waayeenb, kiiska loo haystaana uu yahay eedaymo dhowr ah oo ay ka mid yihiin falal argagixiso oo ay Somaliland ka wadeen laga soo bilaabo 5 April 2005, iyaga oo intaa ku daray in ay dalka ka fuliyaan falal khalkhal-gelin ah oo lagu wiiqayo jiritaanka qarannimada Somaliland.”

“Waxa kale oo maxkamadda la horkeenay marag-muujinno isugu jira 8 xabbo oo ah miinada nooca lidka gaadiidka waaweyn (Anti Tangs), hub isugu jira qoryo iyo bastoolado iyo budooyin kiimiko ah oo marka la isku daro qaraxyo waaweyn samaynaya.Waxa kale oo la sheegay in ay kulamo iyo shirar kala duwan ku yeesheen magaalooyinka Boorama, Hargeysa iyo Burco, isla markaana ay hawshii qabashadoodu keentay dagaal weyni in uu ka dhaco, kaas oo dhaawacyo culculusi ka soo gaadhay qaar ka mid ah ciidammada ammaanka.

Hase yeeshee, dhammaantood way beeniyeen eedaymahaas, waxayna maxkamadda horteeda ka sheegeen in aanay wax dembi ah gelin.

Intaa kadib ayey Xeer-ilaalintu maxkamadda horkeentay 10 cajaladood oo nooca fiidyowga ah, oo ay ku duuban yihiin muuqaalka jihaadka oo lagu sameeyey waddamada Bosnia, Afghanistan iyo Jeejniya. Waxa kale oo maxkamadda la keenay 21 markhaati iyo qoraallo ay bixiyeen iyaga oo dhaarsan markii ay is-difaacayeen.

Kiiska Sh. Maxamed Sh. Ismaaciil ayaa la sheegay in aanay waxba kaga jirin jidh-dil la sheegay in lagu sameeyey iyo in muuqaalka laga duubay ahaa sawir lagu sameeyey mobile-ka.Maxkamaddu waxa kale oo ay xorriyadoodii u celisay laba dawcweysane oo iyaga ku eedaysnaa in ay ka qaybqaateen abaabullo falal waxyeellooyin loogu geysanayo Somaliland, hase yeeshee aan wax caddaymo ah la horkeenin maxmakadda. Sidaa darteedna, waxay maxkamaddu kala noqotay eedihii lagu soo oogay labadaa nin oo kala ah Sheekh Xasan Daahir Aweys iyo Caydhow.

Haddaba, markii la soo gebagebeeyey dacadda ayaa garsoore Cabdiraxmaan Jaamac Hayaan ku dhawaaqay go’aannadii ka soo baxay maxkamadda, isaga oo sheegay in uu adeegsaday qodobadda 222 ee Xeerka Ciqaabta Guud, sidaa darteedna uu midkiiba 25 sannadood oo xadhig ah ku xukumay dembiileyaasha kala ah:

1-Cabdiraxmaan Cismaan Yuusuf
2-Cabdiraxmaan Maxamed Jaamac (Indhacadde)
3-Axmed Cabdi Godane
4-Ibraahim Jaamac Meecaad (Ibraahim Afgaani)
5-Ibraahim-dheere
6-Sahal Axmed Caydiid
7-Iyo Axmed Cali Xuseen (Axmed-keyse).

Sida oo kale, xubnaha lagu xukumay 20 sannadood ee xadhigga ah waxay kala yihiin:
1-Maxamed Sh. Ismaaciil Xuseen
2-Maxamed Ibraahim Axmed (Laba-qumac)
3-Cabdillaahi Maxamed Axmed (Cabdillaahi-gaab)
4-Iyo Muuse Cali Yuusuf.

Markii uu dhammaaday xukunkii maxaabiistu ayey bilaabeen ereyo ay kor ugu dhawaaqayeen, kuwaas oo ay ka mid ahaayeen; ‘ALLAAHU AKBAR, Itoobiya oo cadow ahayd waa laga guulaystay, shareecaddu ta sarraysa ayey noqonaysaa.”

Garsooraha maxkamadda oo ay weheliyaan laba wakiil dadweynaha ka socday oo dhinacyada ka fadhiyey intii kiisku socday ayaa si deg-deg ah looga saaray hoolkii dacwaddu ka socotay. Ehelada maxaabiista ayaa waxoogaa buuq ah ka sameeyey maxkamadda horteeda oo markaa laga qaadayey maxkamadda, kadibna waxa xabbado rasaas ah kor u riday ciidanka ammaanka, si ay u kala dareeriyaan dadka ku soo ururay goobta. Qareennada u doodayey maxaabiistu waxay kala ahaayeen Maxamed Siciid Xirsi iyo Maxamed Cali Cabdi (Carab) iyo Marxuum Rooble Maykal oo geeriyooday intii dacwaddu socotay.

Source: Jamhuuriya Online