Marashi ¹
Waxan xusuustaa muddo aan aadba u fogeyn oo aan ku naalloon jiry Farxad iyo Rayn-Rayn marka karantu dabayaaqo tahay ee aan xasiidda iyo aalaha ka goosto beertayada oo in ka yar laba kiiloo mitir u jirtay guriga. Dabadeed waxan milicsaday faraqa u dhexeeya berigaas oo aanan haba yaraatee cuni jirin cunto aan ahayn tan adawgay muruqooda kula soo baxeen iyo maanta oo inka badan 85% cuntada la quutaa tahay wax dal qalaad laga keenay. Waxa is-weydiin leh, maxaa innagu qasbay in waxa aynu beeran karro lacag adag kaga soo iibsanno dal shisheeye?


Murti gabay haddaan maxamedow midhadh ka taataabto
Nin waliba halkay uga macduu kaaga mariyaaye
Aniguna bar aan qalin marsaday bal aan ka maansoodo

Manfacii dhul laga quudan jiray waa la maanacaye
Moohaar² la soo dhoofiyoo madhiya jeebkaaga
Waa waxa dhaqaalihi makalay miigganaan jiraye
Maan-dooriyaha laygu duray saw mushkilad maaha!!!

Masengeda raggii beeri jiray way I maan garanne
Innagaase magacii dilloo maydhnay quruxdiiye
Adawgeen sirtuu maali jiray marag u soo qaatay

Gugu maalintuu soo curtee maayad soo kiciyo
Eey maamiyaan fooruhuu dirirka miisaamo
Maansiyo guumbood³ kolkay midi u soo booddo
Dharaartaa wuxuu maylin jiray muruq wax soo saare

Intuu laba xaraash⁴ soo madhuu meerar⁵ ugu taago
Marka hore rogaalkii hadduu ciidda kala mooso
Oo maalmo dabadeed shinnida dhab ugu miisaamo
Mahiigaanna baallaha furtoo degelka maansheeyo
Muddo gaaban waakaa biqlee mudhay sidii dooge
Muuqaalka quruxdaa indhuhu arag majeertaane
Kol haddaan muraad loo lahayn saw mushkilad maaha!!!

Isagoo intuu daadku maray milicda raacaaya
Misgahaaga goortuu qarshuu bilic madiixaayo
Waxa maalintaa lagu ceshaa marashi baaq baaqe
Midhadhkii jinqiyey⁶ baad kolkaa uga miciintaaye
Waakaa jirkii soo maraba rays ka muudsadaye
Mayay ku hufyaa ama gudgude baalka mariyaaba
Waa lagama maarmaan raxmaad inu ku miisaaye

Goortuu maraariyo xubniyo madaxa soo tuuro
Uu midhaha soo wada baxshee Luul lawada moodo
Durba xamarrihii⁷ mamay bilaw inu murqaamaaye
Isna macalinkii soo tabcaday miiqay wadhafkiiye
Madfac jeedal-qawlaha⁸ sidii maarre ka cisiiye
Masangiyo gelleydii u baxay milicsi daymoodka
Muruqiisa inu kaashaduu maalay tacabkiisa
Makhluuquba dhammaan wada qiryoo maalintaa aragye
Isaguna macaankeeda dheef qaranna muuneeye
Maxastuna xasiid iyo ka heli aale muud badane
Maqaar-saar haddii laga fadilay saw mushkilad maaha!!!

Wax waliba mudduu leeyahood midho ka goysaaye
Majaday⁹ geshaan guus¹⁰ la xulay maalmo dabadeede
Waxa kuusas laga meeryaan madaxu suurayne
Midhao saarka goortuu hantuu maadhka kala sooco
Manfaciisa waakaa durtaba mahadshay reerkiiye
Madhax bohosha goortuu ku shubo gacalla maamuuso
Maqaamkiisa wuu garan karaa nin u muraadaaye
Qorshahaba haddii laga masaxay saw mushkilad maaha!!!

Murtuu hadalku kala leeyeyehee waxan ku maan-guurshay
Midigtaadu waxay kuu jartaa lagu macaashaaye
Marriin toobal-caare ah lawaa inu miciinaaye
Annagana hadday ma-hurtadii naga maroojeene
Waxa xoogsatadi lagu maxleley rubuc la miisaaye
Magan waxay u tahay china iyo qaar macooda ahe
Maskax lagu dayey ii jirtaa inan ka maarmaaye
Haddii garashadii lagu mergeday saw mushkilad maaha!!!

Muggii weel ma dhaafaa la yidhi maragna soo yaale
Malmalluuqi baa taray hadday murugtay hawshiiye
Martabada raggaan dhawra idhi marinka qaanuunka
Madaxdaan ku baandheeya idhi xaqiyo miisaanka
Dhaameel haddii lagu marsado saw mushkilad maaha!!!


Ali Adam Awaleh
Xasiid2000@yahoo.co.uk

¹Marashi: Birta Jeexda dhulka ee ku rakiban agabka dibiga saaran ee beerta qodaya.
Alla Ha U Naxariistee Waakii Lahaa XAJIIN "Ma Adaa Birtii Jeexaysiyo Boorrow Dibigii Leh" - Birtaa Jeexaysa Weeyaan Marashi
²Moohaar: Qiyaas mug ah oo joonyada ka waabsan
³Maansiyo guumbood: Laba xidig oo beeralaydu ay eegto oo la xidhiidha xiliga beerta la qodayo.
⁴Xaraash: Dibi xaraash waa dibi dhulka qodidiisa ku wanaagsan
⁵Meerar: Labada dibi ee beerta qodaya marka agabka la saarayo.
⁶Jinqiyey: Hadhuudhka aad isagu dhaw ee baaq-baaqu kala rogo.
⁷Xamarihii: Shimbirta yaryaraha la yidhaa ee hadhuudhka cunta
⁸Jeedal-qawlaha: Jeedal inta la wareejiyo dhac laga siiyo oo shimbirtu ka dido
⁹Majaday: Birta qoolaaban ee hadhuudhka lagu gooyo
¹⁰Guus: Marka la sagu tago beerida hadhuudhka, goyntiisa iyo tumistiisa.